مەكتەبی سیاسی یەكێتی: یان جێبەجێكردنی مادەی 140، یاخود راپرسی
پێشمەرگە حەس حەس نییە هەتا بەبڕیاری مەركەزی، ناوچە پارێزراوەكان جێبهێڵێ،
نوچەنێت: هەولێر
لە بەیاننامەیەكدا مەكتەبی سیاسی یەكێتی نیشتیمانی كوردستان، سیاسەتی رەسمی حیزبەكەیان سەبارەت بە رەوشی ئێستای عێراق و ناوچە دابڕێنراوەكان و پێشمەرگە و ماددەی سەد و چل خستەڕوو، لە بەیاننامەكدا مەكتەبی سیاسی یەكێتی جەغت لەسەر درووشمی هەڵبژاردنەكانی حیزبەكەیان كردەوە و رایانگەیاند، یان جێبەجێ كردنی ماددەی سەد و چل، یاخود ریفراندۆم، هەروەها لە بارەی هێزی پێشمەرگەوە دەڵێن: پێشمەرگە حەس حەس نییە هەتا بەبڕیاری مەركەزی، ناوچە پارێزراوەكان جێبهێڵێ.
دەقی بەیاننامەكە
ماددەی (140) زیاتر لە (9) ساڵ بەسەر وادەی جێبەجێكردنیدا تێپەڕیوە، بەڕێز دەوڵەتمەداری عیراقیش، لەخولی دووەمی سەرۆك وەزیریدا، پەیمانیدا لەماوەی ساڵێكدا، بڕگەكانی ماددەكە جێبەجێ بكات، بەداخەوە، ئەم پەیمانەش نەبرایەسەر.
ئێستاش كە عیراق دووچاری دۆخێكی مەترسیداری نەخوازراو بووەو دوژمنانی دیموكراسی و فیدراڵ، دەیانەوێ پرۆسەی سیاسی عیراق هەڵگێڕنەوەو سیستمی سیاسی بگێڕێنەوە بۆ دۆخی (شۆڤێنی- سەلەفی جیهادی) سوپای عیراق و دەزگا ئەمنییەكانیش لەماوەیەكی زۆر كورتتدا، داڕوخێنراون، ئا لەم دۆخەدا، بۆ وڵاتانی جیهان و ناوچەكەو هێزە سیاسییەكانی عیراقیش دەركەوت، كە هەرێمی كوردستان و هێزی پێشمەرگە، سەرەڕای بڕینی بودجەو مووچەو چەك و سوتەمەنی و هەڵبەستنی تۆمەتی سەیرو سەمەرەش بۆ كوردو پێشمەرگە، بەڵام هەر پێشمەرگە توانی بەعسی و داعشییەكان لەهەندێك ناوچەی ستراتیجی نەینەواو لەسەراپای كەركوك و خانەقین و دووز خورماتوو، رۆڵێكی مێژوویی لەپاراستنی ناوچە دابڕێنراوەكانی دەرەوەی هەرێم بگێڕێ و سەرو سامانی خەڵك بپارێزێت، ئەمە جگە لەوەی هەرێمی كوردستان بۆتە پەناگەی ئارامی سەدان هەزار دەربەدەركراوی عەرەب و توركمان و مەسیحی و خەڵكی تریش. بۆیە:
مەكتەبی سیاسی یەكێتیی نیشتمانیی كوردستان جەخت دەكاتەوە كە:
یەكەم: بەڕاشكاوی ئەمساڵ، پێش رووداوەكانی ئێستاش وتومانە، ئەوپەڕەكەی هەتا بەهاری ساڵی ئاییندە، كورد پشووی هەیە، ئەگەر مادەی (140) بەتەواوی جێبەجێ نەكرا، بەبڕیاری سەركردایەتی كوردایەتی، كێشەكە یەكلایی دەكەینەوە.
دووەم: هێزی پێشمەرگە گەڕاوەتەوە سەر زێدی باوو باپیری خۆی. یەك بست ئەرزی هیچ پێكهاتەیەكی ترمان زەوت نەكردووە. بەڵكو پێكهاتەكانی تریش پارێزراوی هێزی پێشمەرگەو ئاسایش‌و پۆلیسن. بۆیە، بێگومان چاوەڕوانین حكومەتی تەوافوقی راستەقینەی عیراق، كە هەقوایە بەم زووانە دابمەزرێ، یەكێك لەئەركەكانی حكومەتە چاوەڕوان كراوەكە، ئەوەیە كە هەڵەی حكومەتەكانی لەمەوبەر سەبارەت بەناوچەكانی مادەی (140) دووبارە نەكاتەوە.
سێیەم: هەموو لایەك دەبێ باش بزانن كە هێزی پێشمەرگە، هێزی بەدیهێنانی ئامانجە سیاسی و دەستورییەكانی عیراق و كوردستان و پارێزەری پرۆسەی دیموكراسیشە، پێشمەرگە حەس حەس نییە هەتا بەبڕیاری مەركەزی، ناوچە پارێزراوەكان جێبهێڵێ، ئەو لایەنەی شكستی خواردووە لەپاراستنی عیراق‌و جێبەجێكردنی دەستورو مادەی (140) دەبێ بخرێتە ژێر بەرپرسیارێتی، نەك تازە تازە كورد چاوەڕوان بكات بەپاساوی یەكێتیی خاكی عیراق و ئەو دەستورەی جێبەجێیان نەكرد، دەستی بەدەستی پێ بكرێتەوە.
چوارەم: یەكێتیی نیشتمانیی كوردستان، سیاسەتی یەكگرتوی كوردستانی پەسەند كردووە. تاقە نوێنەری رەسمی یەكێتی لەوەفدی هاوبەشی هێزە سیاسییەكانی كوردستاندا، هەڤاڵ فریاد رەواندوزی یە، سیاسەتی یەكێتیش سەبارەت بەعیراق، حكومەتی تەوافقی‌و ئیئتیلافی نیشتمانی راستەقینە‌و پۆستە سیادییەكانیش ئاشكرایە. حكومەتی پەراوێزخستنی لایەنەكان رەتدەكەینەوە. لایەنەكانی شیعە سەرپشكن لەهەڵبژاردنی كاندیدی سەرۆك وەزیران، پۆستی سیادی سەرۆك كۆماریش بۆ كوردەو لەناو كوردیشدا سورین لەسەر ئەوەی بۆ یەكێتیی نیشتمانیی كوردستانە. سەرۆكی پەرلەمانیش جارێكی تر پیرۆزی هێزەكانی سوننەیە.
بەم لێدوانە رایدەگەیەنین، كە سیاسەتی یەكێتیی رۆشنە، لەدروشمی مەركەزی هەڵبژاردنی نیسانی ئەمساڵیشدا ئەو سیاسەتە بەرجەستە كراوە كە (یان جێبەجێكردنی مادەی 140، یاخود راپرسی) مەكتەبی سیاسی‌و ئەنجومەنی سەركردایەتیش، داڕێژەرو بڕیاردەرو پابەندی ئەو سیاسەت‌و دروشمەن. هەر ئەم سیاسەتەش دەستەبەری یەكهەڵوێستی كوردو كوردایەتی هێزە سیاسییەكانە، نەك لێدوانی لابەلا كە زیان بەم سیاسەتە یەكگرتووەی كوردستان دەدات.
راگەیاندنی مەكتەبی سیاسی
یەكێتیی نیشتمانیی كوردستان
29/6/2014
