كەمپینێك بۆ لەشفرۆشی
نوچە.نیت.ئاژانسەکان
دانیشتووانی چەند گەڕەكێكی رانیە واژۆیان كۆكردووەتەوە بۆ دەركردنی چەند ماڵێك، كە بە قسەی ئەوان گوایە لەشفرۆشیان تێدا دەكرێت. بەڵام پۆلیس دەڵێت دەركردنی ئەو ماڵانە چارەسەری كێشەكە ناكات.
رائیدی پۆلیس مستەفا محەممەد باپیر، گوتەبێژی بەڕێوەبەرایەتی پۆلیسی راپەڕین بە (رووداو)ی گوت هاووڵاتیانی چەند گەڕەكێك لە رانیە و دەوروبەری، دەستیان كردووە بە كۆكردنەوەی ئیمزا بۆ دەركردنی چەند ماڵێك، كە جێگەی رەزامەندی هاووڵاتیان نەبوون، بەبیانووی ئەنجامدانی لەشفرۆشی لەنێو ئەو ماڵانەدا .
مستەفا محەممەد، ژمارەی ئەو ماڵانەی ئاشكرا نەكردووە، چونكە بە قسەی خۆی تاوەكو ئێستا دەستیان بە لێكۆڵینەوە نەكردووە، تاوەكو ژمارەی ماڵەكان بزانن و گوتی چاوەڕێی بڕیاری دادوەر دەكەین تاوەكو دەست بكەین بە لێكۆڵینەوە لەو ماڵانەی، كە گومان دەكرێت لەشفرۆشیان تێدا بكرێت .
بەڵام بەبڕوای ناوبراو دەركردنی ئەو ماڵانە چارەسەری گرفتەكە ناكات و گوتی ئەوانە ئەگەر لێرەش دەربكرێت، لە شوێنێكی دیكە جێگەی خۆیان دەكەنەوە، جگە لەوەش ئەوانە بە ئاسانی دەستبەرداری ئەو كارە نابن، بۆیە پێویستە حكومەت هۆكار و رێگەچارە بۆ ئەو ماڵانە بدۆزێتەوە، كە ئەم كارە دەكەن .
مەلا سەید مەحموود، ئیمام و خەتیبی مزگەوتی گەورەی شارەدێی بۆسكێنی سەر بە قەزای رانیە گوتی لەلایەن خەڵكی لە خواترس و ئیختیار و موختاری ناوچەكەیان ئاگادار كراونەتەوە لە بوونی چەند ماڵێك لە سنوورەكەیان، كە گوایە لەشفرۆشی تێدا دەكرێت.
مەلا سەید مەحموود گوتی هەندێك لە هاووڵاتیان گوتیان دەچین ئاگر لە خانووەكانیان بەردەدەن، بەڵام ئێمە ئاگادار كردنەوەی پۆلیس و دادگامان بە باشزانی، بۆیە روومان لە بنكەكانی پۆلیس كرد بۆ سكاڵا .
مەلا سەید مەحموود گوتیشی نزیكەی 300 بۆ 350 واژۆمان كۆكردووەتەوە، بە لایەنی پەیوەندیدارمان گوتوە، كە ئەگەر ئەو ماڵانە دەرنەكرێن، رێگە دیكە دەگرینەبەر .
ئەو مەلایە باسی كاری لەشفرۆشی لە روانگەی شەریعەتی ئیسلام كرد و گوتی لە ئیسلامدا هەركەسێك زینا بكات ئاگادار دەكرێتەوە و ئامۆژگاری دەكرێ، كە ئامادەیی ئەوەیان نەبوو خۆیان باشبكەن دەردەكرێن، ئەگەر هەر بەردەوامبوون ئەو كەسانەی كە هاوسەرگیریان كردووە دەبێت رەجم بكرێن، ئەوانەشی كە هاوسەرگیریان نەكردووە دەبێت 100 جەڵدەیان لێبدرێت .
