ئه‌سعه‌د مورادى، تایبه‌ت به نوچه نێت
به‌هار مه‌حموود په‌رله‌مانتارى كورد پێیوایه زۆربه‌ى كێشه‌كان له عێراق له چه‌كى نایاسایى سه‌رچاوه ده‌گرێت و له‌باره‌ى هه‌ڵمه‌ته‌كانى كازمى بۆ چه‌كداماڵێن ده‌ڵێ، دره‌نگه و ده‌بووایه زووتر ده‌ست پێ بكات.
به‌هار مه‌حموود ئه‌ندامى لیژنه‌ى یاسایى له په‌رله‌مانى عێراق، له لێدوانێكى تایبه‌ت به نوچه‌نێت، باس له دوایین گرژییه‌كانى عێراق ده‌كات و ده‌ڵێ، “هه‌مووى به‌هۆى ئه‌وه‌یه چه‌ك به ده‌ست میلیشیا و حزبه‌كانه‌وه‌یه”.
ئه‌و په‌رله‌مانتاره كورده چه‌ندان نموونه‌ى تاوان و خراپه‌كارى ده‌هێنێته‌وه كه به‌هۆى چه‌كه‌وه سه‌ریان هه‌ڵداوه و پرۆسه‌ى سیاسى و كارگێرییان له عێراق تێكداوه.
له درێژه‌ى لێدوانه‌كه‌ى به‌هار گوتى، “ساخته‌كاریى هه‌ڵبژاردن، كوشتنى رۆژنامه‌نووس و چالاكوانان، رفاندن، دزيى، هه‌ر كارێكى ترى نایاسایى، به‌هۆى ئه‌و چه‌كه‌وه‌یه”.
له كۆتایى لێدوانه‌كه‌یشى باسى له‌وه كرد كه هه‌ڵمه‌ته‌كه‌ى كازمى دره‌نگه ئه‌گه‌ر باشیش بێ، “ده‌بووایه زۆر زووتر و به‌ر له كازمى ئه‌و كاره بكرێ، چونكه دیارده‌ى چه‌كى نایاساییه عێراق به‌ره‌و كاره‌سات ده‌بات”.
