بۆچی برۆ و مژۆڵمان هەڵدەوەرێ؟
نوچە.نیت.هەولێر
هەر مووی سەرمان دەستی بە هەڵوەرین كرد، بیر لەوە دەكەینەوە، بۆ چارەسەركردنەكەی بچینە لای پزیشك، بەڵام كە مووی برۆ و مژۆڵمان هەڵدەوەرێ، زۆر زوو پێی نازانین. لە حاڵێكدا مووی برۆ و مژۆڵەكان دەورێكی زۆر گرینگیان لەسەر جوانیی روخساری بنیادەم هەیە، هەر بۆیە نابێ زۆر بیگنخێنین و لێگەڕێین برۆ و مژۆڵمان تەنك ببنەوە ئینجا بیر لە چارەسەریان بكەینەوە. پسپۆڕەكانی ئەو بوارە دەڵێن، هۆكاری بۆماوەیی و خوێنی دەورێكی ئەوتۆیان لە هەڵوەرینی مووی برۆ و مژۆڵدا نییە و ئەو بەشە پەیوەندیی بە هۆرمۆنەكانەوە نییە.
دەیان هۆكاری جیاواز بۆ هەڵوەرینی
برۆ و مژۆڵ
پسپۆڕان دەڵێن، لەوانەیە ئەو هۆكارانەی كاریگەرییان لەسەر قژ هەیە و دەبنە هۆی رووتانەوەی سەر، ئەو بەڵایە بەسەر برۆ و مژۆڵیشمان بێنن، لە لایەكی دیكەوە، دەبێ بزانین، یەكەم هەنگاوی چارەسەری ئەو دەردە، ئەوەیە هۆكارە سەرەكییەكەی ئەو هەڵوەرینە بدۆزینەوە.
پسپۆڕان دەڵێن، دڵەڕاوكێ و بەدخۆراكی و نەخۆشی و كۆمەڵێك كێشەی دیكەی وەك كەمخوێنی و تێكچوونی تیرۆییدیش بەشێكی دیكەن لە هۆكارەكانی هەڵوەرینی موو. لەگەڵ ئەوەشدا بەكارهێنانی كەرەستەكانی خۆجوانكردن و ئارایشت لە دەوروبەری چاودا هۆكارێكی دیكەیە.
ئەوانەی دەست دەكەنەوە بە چاندنەوەی مووی ئەو شوێنانەی وا رووتاونەتەوە، دەبێ پرس بە پزیشك و پسپۆڕەكانی ئەو بوارە بكەن. دكتۆر ئیحسان میرفەخرایی پسپۆڕی ئەو نەخۆشییانە دەڵێ: تا ئەو جێیەی بلوێ، باشترە بە داودەرمان چارەسەر بكرێت و پێشكەوتنەكانی بواری پزیشكی ئێستا چارەسەری باشیان بۆ دۆزیوەتەوە، ئەگەر بە داودەرمانیش چارەسەر نەكرا، ئەوە دەكرێ بیر لە چاندنەوە بكەینەوە. ئەو پسپۆڕەی زانكۆی تاران دەڵێ: چاندنەوەی مووی برۆ زۆر ئاسانە، بەڵام مژۆڵ زۆر هەستیار و ئەستەمە، لە لایەكی دیكەشەوە چونكە ئەو مووەی دەچێنرێتەوە لە قژی سەر هەڵدەگیرێ، گەشە و هەڵدانەكەی خێراترە.
لە لایەكی دیكەیشەوە، چاندنەوە دەبێ زۆر بە وردی و زانستیانە بكرێت و لەبیریشمان بێت، ئەو شوێنەی دەچێنرێتەوە، هەرگیز وەك جاری جارانی لێ نایەتەوە.
پسپۆڕانی بوارەجۆراوجۆرەكانی پزیشكی دەڵێن: باشترین چارەسەر پێشگرتنە. واتە بەر لەوەی تووشی نەخۆشینەكە بین، خۆمان بپارێزین. بۆیە بەشێكی زۆری لەدەست خۆماندایە. بۆ وێنە هەوڵ بدەین كەشێكی هێمن و ئارام بۆ ژیانمان بخوڵقێنین و لە كاتی دڵەڕاوكێ و پەرۆشییەكانماندا پرێسكەی دڵمان بۆ كەسێكی جێ متمانە بكەینەوە. لە لایەكی دیكەشەوە هەر چەشنە نیشانەیەكمان بەدی كرد، زۆر خێرا سەردانی پزیشكی پسپۆڕ بكەین.
