ئه‌وه‌ی به‌سه‌ر منیان هینا كه‌سه ئه‌منییه‌كانی پارتی هیچ جیاواز نه‌بو له په‌له‌كێش و لێدان و ئازار دانی هێزه ئه‌منییه‌كانی به‌عس
شوان سدیق
ئه‌وان رۆڵه و گه‌نج و هاونیشتیمانی ئه‌م وڵاته‌ن، ئه‌و نیشتیمانه‌ی كه تێیدا ده‌ژین نیشتیمانی هه‌مومانه، واته ئه‌وان و ئێمه پێكه‌وه له چوارچێوه‌ی شوێنێكدا كیانێكمان پێكهێناوه و تێدا ده‌ژین. مه‌به‌ست ده‌سه‌ڵاتدارانی پارتی و یه‌كێتییه به‌تایبه‌تی له هه‌ولێر.
كاتێك هه‌مومان له‌م كیانه‌دا به‌شداریمان كردو تێیدا ژیان ده‌كه‌ین، ئیدی ده‌بێ بۆچون و بیركردنه‌وه ئایدیایه‌كانی یه‌كمان لاپه‌سه‌ند بێ، خۆ ناكرێت، یه‌ك ئایدۆلۆژیاو یه‌ك باوه‌ڕی ناسیۆنالیستی یان ئیسلامی و چه‌پ یاخود هه‌ر بیربۆچونێكی دی به‌سه‌ر هه‌مو كه‌سه‌كاندا له كوردستان بسه‌پێندرێت.
من نوێنه‌ری گۆڕان و كۆمه‌ڵ و یه‌كگرتو پارتی و یه‌كێتیش نییم، بیركردنه‌وه‌ی من له‌و روه‌وه‌یه كه ده‌بێ هه‌مو ئینسانێ مرۆڤێك به هه‌مو قه‌ناقه‌ت و بۆچونێكی جیاواز مافی ئه‌وه‌ی هه‌بێ بژێت و بیربكاته‌وه و سیاسه‌تیش بكات، چونكه وه‌ك وتم ئه‌م وڵاته ته‌نیا وڵاتی پارتی یان یه‌كێـتی نییه یاخود به ته‌نیا هی ئه‌و ئیسلامیانه‌ش نه‌بو كه له هه‌ڵه‌بجه و هه‌وراماندا سیاسه‌تی پارتی و یه‌كێـتی ئاسا به‌سه‌ر خه‌ڵكیدا سه‌پاندبویان.
كاتژمێر 1ی پاش نیوه‌ڕۆی رۆژی دوشه‌ممه (18/ 4/ 2011) دوای ئه‌وه‌ی په‌یوه‌ندییه‌كی ته‌له‌فۆنیم له‌گه‌ڵ كرا گوایه گردبونه‌وه‌یه‌ك ساز ده‌كرێت، وه‌ك هه‌ڵوێستێك له‌به‌رامبه‌ر ئه‌و روداوه نه‌خوازراوانه‌ی ئه‌مڕۆ گۆڕه‌پانی سیاسی و كه‌لتوری و فه‌رهه‌نگی و دینی گرتۆته‌وه. له كوردستان.
منیش به ئه‌ركی خۆمم زانی وه‌ك رۆژنامه‌نوسێك نه‌ك كه‌سێكی خۆپیشانده‌ر، چونكه هه‌میشه باوه‌ڕم به‌وه‌یه ده‌بێ رۆژنامه‌نوس بێ لایه‌ن بێت، ئه‌گه‌ر مه‌به‌ستی هه‌ر به‌شداریكردنێك بكات، له كۆڕو كۆبونه‌وه و خۆپیشاندان و بۆنه جیاجیاكاندا، دوای ئه‌وه‌ی نزیك بومه‌وه له گرد بونه‌وه‌كه‌ی شاری هه‌ولێر كه كه‌وتبوه نزیك مزگه‌وتی ره‌شاد موفتی له به‌رامبه‌ر وه‌زاره‌تی خوێندانی باڵا من به‌هیچ جۆرێك تێكه‌ڵ كه‌سانی خۆپیشانده‌ر نه‌بوم، به‌ڵكو به دوری (15 تا 20) مه‌تر له دوری ئه‌و كه‌سانه‌ی كه گردبونه‌وه‌كه‌یان سازكردبو، منیش سه‌رقاڵی وێنه گرتن بوم به كامێرایه‌كی نیكۆن له جۆری مۆدێلی (60).
روداوه‌كه لێره‌وه ده‌ست پێده‌كا هه‌ر ئه‌وه‌نده سه‌یربو كه وێنه‌یه‌كی گردبونه‌وه‌كه‌م گرت، كاتێك زانیم له هه‌ر چوار لاوه كه‌سه ئه‌منییه‌كانی “پارتی” به‌ره‌و روم هاتن، هاتنی ئه‌وان هاتنی كۆتایی هێنان بو به ژیانی من، نه‌ك ئه‌وان ته‌نیا مه‌به‌ستیان ئه‌وه‌بێ كامێرام لێ وه‌ربگرن. چونكه به ئاسانی كامێراكه‌م پێ ده‌دان له‌به‌رخاتری گیانی خۆم.
كاتێك كه خۆمم پێناساندن و باجی ده‌زگاكه‌میان بیینی له ملمدا بو، به‌ڵام بێ سود بو نزیكه‌ی 15 تا 20 كه‌س ده‌بون، كه‌جل و به‌رگی مه‌ده‌نیان له‌به‌ردا بو، ئه‌وان به‌شێكیان داریان به‌ده‌سته‌وه، به‌بێ ئه‌وه‌ی له ناسنامه و كه‌سێتی و شه‌خسی من بپرسن كه بۆچی وێنه‌ی گردبونه‌وه‌كه‌م گرتوه، كه‌سه ئه‌منییه‌كانی “پارتی” به شه‌ق و بۆكس و دارو پێ له‌قه هه‌رچی مه‌به‌ستیان بو كردیان، وه‌ك ئه‌وه‌ی كه‌سێكی تۆمه‌تباریان ده‌ستگیر كردبێ و تاوانه‌كه‌ی به‌سه‌ردا ساغ بوبێته‌وه.
كه‌سه ئه‌منییه‌كانی “پارتی” دوای ئه‌وه‌ی به ئاره‌زو و خواست و هێزی خۆیان هه‌مو جۆره لێدانێكیان له‌مندا تاقی كرده‌وه، به چوار كه‌س كه هه‌ر یه‌كه‌یان قاچ و ده‌ستمیان گرتو به‌رزیان كردمه‌وه، به لێدان و سوكایه‌تی جنێودان ته‌سلیمی ئۆتۆمبێلی پۆلیسی فریاكه‌وتنیان كردم، ئۆتۆمبێله‌كه‌ش نزیكه‌ی 20 مه‌تر له شوێنی لێدانه‌كه‌وه دور بو.
لێدانی ئه‌و كه‌سه ئه‌منیانه‌ی پارتی له لێدانی جه‌لاده‌كانی به‌عس ده‌چو لێدانی ئه‌وان لێدانێك بو كه‌مه‌به‌ستیان ئه‌وه‌بو ئه‌گه‌ر كۆتایی به‌ژیانت نه‌هێنن، ئه‌وا شوێنێك له جه‌سته‌ت سه‌قه‌ت بێت به یه‌كجاری، چونكه سه‌ره‌رایی ئه‌وه‌ی ده‌یان كه‌س به‌شه‌ق و دارو تێڵا لێیان دام، كه‌سێكی باڵا به‌رزی راهێنراوی ئه‌منی هه‌ر له‌و راهێناوانه ده‌چو كه له به‌ندیخانه‌ی ده‌سه‌ڵاته دیكتاتۆر و تۆتالیتارییه چه‌پ و ئیسلامی و ناسیۆنالیسته‌كان ده‌چو، كه ئیعتراف به‌كه‌سی گومان لێ كراو ده‌كات، بۆ ئه‌وه‌ی ئیعتراف به‌و تۆمه‌ته‌ی بكات كه خراوه‌ته‌وه پاڵی.
ئه‌و كه‌سه راهێنراوه كاتێك هه‌ردو ده‌ست و قاچم به‌ده‌ست كه‌سه ئه‌منییه‌كانی تره‌وه بو، ئه‌و ده‌ستی خسته بینه قاقام له‌و كاته هه‌ردو چاوم پڕبو له ئاو به‌ڵام به‌هۆی ئه‌وه‌ی لێیان ده‌دام به بۆكس و دار بورامه‌وه ته‌نیا ئه‌و كاته زانیم فڕیانداومه‌ته ناو ئۆتۆمبێلی پۆلیسی فریاكه‌وتن.
ئه‌وه‌ی ماوه بیڵێم بون و وجودی ئینسان و مافی مرۆڤه له‌م وڵاته، هیچ شتیك قه‌ناعه‌تم پێناكات له كوردستان به‌تایبه‌تی هه‌ولێر شتێك هه‌بێ به‌ناوی مافی مرۆڤ، چونكه ئه‌و روداوه‌ی به‌سه‌ر منیان هینا كه‌سه ئه‌منییه‌كانی “پارتی” هیچی جیاواز نه‌بو له‌و په‌له‌كێش و لێدان ئازار دانه‌ی كه له ساڵی 1988 دا هێزه ئه‌منییه‌كانی به‌عس به‌خێزانه‌وه راپێچیان كردین له سلێمانییه‌وه بۆ نوگره سه‌لمان.
