30 سالیا پارتی گەل
بێستون بەرواری
لروژێن 26 – 30 ێ تیرمەھێ لسالا 1981ێ ، یانكو بەری سی سالان، چەند پێشمەرگە و كادرو سەركردە و تێكوشەرێن دی لھەڤ جڤیان و رەوشا كورد وكوردستانێ ھەلسەنگاندن و وپێكڤە لچارەسەریەكێ گەریان.ئەوان ،كو ھەریەك خوەدان ئەزمونەكا درێژ بون د تەڤگەرا رزگاریخازا كوردستانێ دا ورولێن مەزن تێدا گێرابون،دیتن كو ژبو رزگاریێ گەلێ كورد پێتڤی خەباتەكا نەتەوایەتی و چینایەتی ھەیە و ژبو ڤێ جورە خەباتێ ژی پێویستی بدامەزراندنا رێكخستنەكا پێشەنگ ھەیە . وان تێكوشەران پشتی دانانا ئارمانج و رێباز و پروگرامێ رێكخستنێ ناڤێ وێ دانین پارتی دیموكراتی گەلی كوردستان و دامەزراندنا وێ ژی راگەھاندن.
ھزر و رێباز و ھەلویستێن پارتی گەل ژچەند خالێن سەرەكی پێكدھات وەكی:
– داخازكرنا مافێ چارەنوسی بو گەلێ كوردستانێ.
– پێكڤەگرێدانا خەباتا نەتەوەیی و یا چینایەتی .
– خەباتا چەكداری و یا رامیاری تمامكەرێن ھەڤدونە بورزگاریا كوردستانێ.
– بھێزكرنا راگەھاندن و دیبلوماسیا كوردی و بكارئینانا وان بو پێشڤەبرنا شورشێ.
– دەستنیشانكرنا ناكوكیێن سەرەكی و جوداكرنا دوژمنان و ھەڤركان دخەباتێ دا.
– داخازا پێكانینا بەرەیەكێ كوردستانی دھەر پارچەیەكێ كوردستانێ دا ودامەزراندنا بەرەیەكێ نەتەوەیی لسەر ئاستێ كوردستانێ ژوان بەرەیان.
– گونەھباركرنا ھاریكاریكرنێ لگەل رژیمێن داگیركەرێن كوردستانێ. وھەروەساژی گونەھباركرنا شەرێ براكوژیێ دناڤبەرا ھێزێن كوردستانی دا.
لسەر ڤان بیرو باوەریا پارتی گەل شیا:
– تورەكا بەرفرەھا رێكخستنێ دروست بكەت دناڤ باژێران دا و ھەروەساژی دناڤ رەڤەندا كورد دا لئیرانێ و ئەوروپا و ئەمریكا ژی. و ژمارەكا مەزن ژ روناكبیر و ھونەرمەند و كەسایەتیێن نیشتمانپەروەر لدورێن خوە كوم بكەت.
– پشكداریێ دخەباتا چەكداریدا بكەت لپرانیا دەڤەرێن كوردستانێ ودڤێ رێ دا چەندین شەھید ژی پێشكێشی ئازادیا كوردستانێ كرن.
– راگەھاندنەكا كاریگەر و سەركەتی دامەزراند وەكی روژناما گەل بزمانێ عەرەبی و گوڤارا پێشەنگ بزاراڤێن سورانی و كرمانجی و بتیپێن عەرەبی و لاتینی.سەرەرای وەشانا رادیویی ولسالێن 1992ێ ژی وەشانا تەلەفزیونی لھەڤلێر و لدھوكێ.
– دپەیوەندیێن دیبلوماسیدا ژی چالاكیێن بەرچاڤ ھەبون لئاستێ ئەوروپا و ئەمریكا و ھندەك وەلاتێن عەرەبی.
– تەڤی سالێن كورتێن خەباتا پارتی گەل وئاستەنگێن مەزنێن ھاتینە رێكا وێ، ئەڤێ پارتێ رولەكێ گرنگ گێرا دھشیاركرنا گەل دا و پەروەردەكرنا ژمارەكا مەزنا پێشمەرگەو كادران لسەر بنەمایەكێ نەتەوەیی ودلسوزیێ بو گەل و وەلاتی . رێباز و پەروەردەیا پارتی گەل گرێدانەكا ھزری یامكوم دناڤ ھاڤالێن وێ دا پەیداكریە كو ھێشتا كاریگەریا وێ لسەر وان و رەوشتێ وان دیارە.
پارتی دیموكراتی گەلی كوردستان درەوشەكا ئالوزا كوردستانێ دا ھاتە دامەزراندن و گەلەك سەختی ژی كەتن رێكا وێ ھەتا كو پشتی 11 سالان بنەچاریڤە لگەل حزبا سوسیالیستا كوردستانێ و پاسوك یەكگرت و پاشی پێكڤە چونە ناڤ پارتی دیموكراتی كوردستان.
روژا ئیرو بدەھان كادرویێن پارتی گەل پێگەھاندین درێزێن پارتی دیموكراتی كوردستان دا جی گرتینە و گەلەك ژی دناڤ یەكیتی نیشتمانی كوردستان دا دخەبتن،گەلەك ژی دسازیێن حكومەتا ھەرێما كوردستانێ دا خزمەتا گەلێ خوە دكەن. ھەروەساژی ژمارەكا مەزن ژ ھەڤالێن پارتی گەل بێلایەن روێنشتینە ولدەرڤەی وەلاتی دژین .
بڤێ ھەلكەفتێ:
– سەرێ رێز وحورمەتێ ژبو شەھیدێن پارتی گەل و ھەمی شەھیدێن رێكا رزگاریا كوردستانێ دچەمینم.
– سلاڤ و پیروزباھیا پێشكێش دكەم بو ھەمی ھەڤال و لایەنگرێن ژبو وی رێبازی تێكوشین و قوربانی داین.
– داخازێ ژ حكومەتا ھەرێمێ دكەم رێز لخەباتا وان ھەڤالێن بێلایەن ماین بھێتە گرتن ومافێن وان و ھەمی شەھیدێن پارتی گەل بھێنە دان.
– داخازێ ژھەمی ھەلگرێن وی رێبازێ پیروز دكەم ھەر وەكی جاران بەرژەوەندیا نەتەوەیی لبەرچاڤان بگرن ،دەستكەفتێن گەلێ كورد بپارێزن وبھەمی ھێزا خوە لدژی گەندەلیێ راوەستن . چونكی ئەڤ دەستكەفتە بەرھەمێ خەباتا مە ھەمیانە.
– داخازێ ژوان ھەڤالان دكەم یێن پێچێبونا نڤیسینێ ھەی بیرھاتن و پێزانینێن خوە لسەر خەباتا پارتی گەل بنڤیسن و بەلاڤ بكەن چونكی ئەو پارچەكە ژ دیروكا بزاڤا رزگاریخازا كوردستانێ.- داخازێ ژ میدیا كوردی دكەم راپورتاژو ڤەكولینا لسەر خەبات وتێكوشین وھزر و ھەلویستێن پارتی دیموكراتی گەلی كوردستان بكەن كو گەلێ مە مفای ژێ وەرگریت.
سوید 22/7/2011
