نوچەنێت: تایبەت
چاودێرێکی سیاسی رایدەگەیەنێت، ئەو سەردانەی شاندی حکومەتی هەرێم بەسەرۆکایەی نێچیرڤان بارزانی، رەنگە هەنگاوی یەکەم بێ بۆ ئەوەی پرۆسەیەکی دیکە دەستپێبکات. دەشڵێت “ئێران کاریگەری هەیە لەسەر سیاسەتەکان و ئاراستەی سیاسی حکومەتی ناوەند هەیە”.
رۆژی شه‌ممه ٢٠-١-٢٠١٨، شاندێكی حكومه‌تی هه‌رێمی كوردستان به سه‌رۆكایه‌تی نێچیرڤان بارزانی، سه‌رۆكی حكومه‌ت گەیشتە به‌غدا و دوای دیدا لە گەڵ حەیدەر عەبادی سەرۆکوەزیرانی عێراق، به‌ره‌و تارانی پایته‌ختی كۆماری ئیسلامی ئیران به‌رێكه‌وتن؛ له ئێران له‌گه‌ڵ حه‌سه‌ن روحانی، سه‌رۆككۆمار و چەند بەرپرسێکی باڵای ئەو وڵاتە كۆبوونه‌وه.
لە لێدوانێکی تایبەت بە نوچەنێت، عادل عەلی، چاودێری سیاسی، سەبارەت بە سەردانی شاندی حکومەتی هەرێم بۆ بەغدا و تاران رایگەیاند: ئەو سەردان گفتوگۆیانەی لە ئاستی باڵا دەکرێن، نە ئەوەیە ئۆمێدی لەسەر هەڵبچنی و نە ئەوەیە نادیدە و کەم بایەخ بکرێ، ئەگەر نمونەی سەردانی ئێران بهێنینەوە، ماوەیەکی زۆترە هەرێم لە گەڵ ئێران جۆرێک لە دابڕان دروست بووە، بەتایبەت دوای ریفراندۆم هەڕەشی داخستنی دەروازەکان. ئەو سەردانەی شاندی حکومەتی هەرێم بەسەرۆکایەی نێچیرڤان بارزانی، رەنگە هەنگاوی یەکەم بێ بۆ ئەوەی پرۆسەیەکی دیکە دەستپێبکات.
عادل عەلی دەڵێت، ئەم لەوانەیە پەیوەندی بە رووداوەکانی ئێرانەوە هەبێ، کە پێداچوونەوە بە پەیوەندییەکانی خۆیدا بکات و تەماشای هاوکێشە و گۆڕانکارییەکان بکات. هەرێمی کوردستانیش، مافی خۆیەتی وەک دراوسێیەکی ئێران پەیوەندییەکی دروست بکات و پەیوەندییەک بێت، کە بتوانێ لەبەر رۆشنایی بەرژەوەندییەکانی هەرێم مامەڵە بکەین لە داهاتوودا.
بە بڕوای ئەو چاودێرە سیاسییە، ئەو سەردانە بۆ بەغدا هەنگاوی یەکەمە بۆ لێکتێگەیشتن، دیارە بەو جێندایەی، کە پێشوو ئێمە هەمانبوو یان بەو پێگە و قورساییەی، کە هەمانبوو، رەنگە نەتوانین جارێکی دیکە بەو شێوەیە مامەڵە لەگەڵ عەبادیدا بکەین، بمانەوەێ و نەمانەوێ، بەو ریفراندۆمە پاشەکشەیەکی گەورەمان کردووە لە رووی قورسایی و پێگەوە، دەبێ لاپەڕەیەکی دیکە هەڵبدەینەوە و وابکەین ئەو مافە دەستووری و یاساییانە، کە کورد هەیەتی ئێمە جەخت لەسەر ئەو بابەتتانە بکەینەوە، بەتایبەت ئەو مەسەلانەی رەنگە عەبادی پێویستی بە هاوپەیمانی هەبێ. هەروەها پێویستی بە ئارامی و جێگیرییەک هەیە لە لە ئاستی پەیوەندییەکانیدا. گوتیشی دەکرێ ئێمە ئەم هەلە بقۆزینەوە و هەرێمیش بتوانێ بەشێک لەو مافانی وەربگرێتەوە. دەبێ ئەزموون لە پەیوەندییەکان وەربگرین و شەفافیەت بدەینە پەیوەندییەکانمان.
لەبارەی کارتی فشاری هەرێم بەرانبەر بەغدا عادل عەلی گوتی “تاکە کارتی فشاری کورد کشانەوەیە لە پرۆسەی سیاسی و حکومڕانی لە ناوەند، بە بڕوای من تائێستا کورد ئەو کارتەی بە کار نەهێناوە، چونکە کورد پێکهاتەیەکی سەرەکییە هەم لەعێراق و هەم لە ئەنجومەنی نوێنەران، هەرچەند پۆست و پێگەی لە حکومەتی ناوەند بەهێز نییە، بەڵام وەک لایەنە مەعنەوییەکەی نەتەوەی دووەمە لە عێراق؛ ئەگەر مافە یاسایی و دەستوورییەکانی وەکو پێویست جێبەجێ نەکرێ لە چوارچێوەی عێراقدا، کورد دەتوانێ هەڕەشەی کشانەوە لە پرۆسەی سیاسی عیراق دا بکات.
عادل عەلی ئاماژەی بەوەدا، کە لە ئێستادا دەرگای گفتوگۆ کراوەتەوە و کێشەکە ئەوەیە، کورد چۆن بتوانێت زیرەکانە و بەشێووازێکی واقعیانە بتوانێت پرۆسەیە بەشدار بێ، عینادی تەنیا لە لای عەبادی نییە، لە هەرێمیش جۆرێک لەو حاڵەتە هەبووە؛ دەبێ بەشێوازی عەقڵانی لاپەڕەیەکی دیکە لە پەیوەندی لە گەڵ عیراق هەڵبدەینەوە، کە مەبەست زانینی قازانج و زیانی ئێمەیە لە پرۆسەکە.
ئەو چاودێرە سیاسییە ئەوەشی خستەڕوو، کە سەردانی شاند بۆ ئێران، بمانەوێ و نەمانەوێ، ئێران کاریگەری هەیە لەسەر سیاسەتەکانی حکومەتی ناوەند؛ هەروەها کاریگەری لەسەر ئاراستەی سیاسی ناوەند هەیە، ئێران دراوسێیەکی گەورە و قورسایی سیاسی و ئایدیۆلۆژی هەیە لە کۆی پرۆسەی سیاسی لە عێراقدا.
