“دوای ئەمەریكا چەند وڵاتێكی تریش چەك بە پێششمەرگە دەدەن”

(نوچەنێت) فەرهاد حەسەن

ماوەیەكە  لیژنەی كاروباری پێشمەرگە لە پەرلەمانی هەرێمی كوردستان سەردانی مەیدان بۆ بنكەكانی مەشق و راهێنانی هێزی پێشمەرگەی كوردستان لە تەواوی شارەكان ئەنجام دەدەن و سەرۆكی ئەو لیژنەیەش دەڵێ ئەو سەردانە مەیدانیانەمان بۆ ئاگاداربوونە لە دۆخی پێشمەرگەو ئاستی مەشق و راهێنانەكان و هەمانكاتیش چاودێری كردنی بەرنامەی چاكسازی حكوومەتی هەرێمی كوردستان لەناو هێزی پێشمەرگە.

رێڤینگ هروری سه‌رۆكی لیژنەی كاروباری پێشمەرگە لە لێدوانێكدا بە (نوچەنێت)ی راگەیاند: بەپێی ئەو بەرنامەیەی لە لیژنەكەمان هەمانە، سەردانی زۆرێك لەو بنكانەمان لە شارەكانی هەرێمی كوردستان كردووە، ئامانجمان لەو بەسەركردنەوانە ئاگاداربوونە لە رەوشی هێزی پێشمەرگە و مەشق و راهێنانەكانیان و هەروەها بەردەوامی ئەو مەشقانەو رۆِڵی هاوپەیمانان و وەزارەتی پێشمەرگە لەسەر ئەم بابەتە”.

ناوبراو ئەوە دووپات دەكاتەوە كە وەزارەتی پێشمەرگەو هێزەكانی هاوپەیمانان لەسەر ئەو گرنگیدانە بە هێزی پێشمەرگە سوورن و بەردەوامیشن لەو پلان و بەرنامەیەی كە بۆ مەشق و راهێنانی پێشمەرگە دانراوەو بە بەردەوامی بەڕێوەدەچێت.

باسی لەوەش كرد كە “سەردانمان بۆ هەریەك لە یەكەكانی حەفتاو هەشتای هێزی پێشمەرگە كردووەو مەبەستمان بوو لە نزیكەوە ئاگاداری ئەوە بین كە ئاخۆ تاچەند ئەو هێزانە ئامادەباشن بۆ یەكخستنەوەی هێزی پێشمەرگەی كوردستان لە چوارچێوەی ئەو بەرنامە چاكسازییەی كە حكوومەتی هەرێم كاری لەسەر دەكات، دیارە ئەوەی ئێمە تێبینیمان كرد، شتی باش و ئەرێنیمان بینی بۆ ئەو یەكخستنەوەیەیان و تەنانەت پێشوازی زۆر باشیشمان لەلایەن فەرماندەكانی ئەو دوو هێزە بۆ یەكخستنەوەی بینی”.

لەئێستاشدا مەشق و راهێنان بەشێوەیەكی بەردەوام بە پێشمەرگە دەكرێت، دیارە ماوەیەك بەهۆی بڵاوبوونەوەی پەتای كۆڕۆنا مەشقەكان وەستابوون، بەڵام دواتر بەردەوام كرایەوە، ریڤینگ هروری دەڵێ “هاوكاریكردنی هێزە هاوپەیمانەكانیش بۆ مەشق و راهێنانی هێزی پێشمەرگە بەردەوامەو بە ئێمەشیان راگەیاندووە كە ئەو هاوكاریانەیان بەردەوام و درێژەی دەبێت”. ئەوەشی خستەڕوو كە “دیارە ماوەیەك لەمەوبەریش هەردوو لیوای 14 و 16 ی هێزی پێشمەرگە لەلایەن وەزارەتی بەرگری ئەمەریكاوە پڕچەك كران، دیارە بەرنامەی دیكەش هەن بۆ زیاتر پڕچەك كردنی هێزی پێشمەرگە لەلایەن هاوپەیمانانەوە، بەڵام وەك كات دیار نیە، دڵنیاین لەوەی كە هێزەكانی هاوپەیمانان لەهەموو روێكەوە پشتگیریی و هاوكاری هێزی پێشمەرگە دەكەن، لە رووی چەك و تەقەمەنییەوە بەتایبەتیش بۆ ئەو هێزانەی سەر بە وەزارەتی پێشمەرگەن”.

ناوبراو ئەوەی رەتكردەوە كە وڵاتێكی دیاریكراو هەبێت بەتایبەت مەشق و راهێنان بەهێزی پێشمەرگە بكات، وتیشی “وڵاتێكی دیاریكراو نیە كە بوترێ ئەو ووڵاتە مەشق و راهێنان بە پێشمەرگە دەكات بەڵكو هێزەكانی هاوپەیمانان بەگشتی ئەو كارە بۆ پێشمەرگە دەكەن، ئەوەنەبێ كە ماوەیەك پێش ئێستا وەزارەتی بەرگری ئەمەریكا دوو لیواكەی پێشمەرگەی پڕچەك كرد ، دەنگۆی ئەوەش هەیە لەداهاتوودا هێزەكانی دیكەی هاوپەیمانانیش یارمەتی و پشتگیری هێزی پێشمەرگە بە چەك و تەقەمەنی بكەن”.

لەبارەی جێبەجێكردنی بەرنامە چاكسازییەكەی حكوومەتی هەرێمیش  لە وەزارەتی پێشمەرگە، سەرۆكی لیژنەی كاروباری پێشمەرگە ووتی “لەچوارچێوەی ئەو بەرنامە چاكسازییەی كە حكوومەتی هەرێم كاری لەسەر دەكات دیارە وەزارەتی پێشمەرگەش بۆ ئەم مەبەستە چەند لیژنەیەكی داناوە بۆ چاكسازی كردن لە ریزەكانی هێزی پێشمەرگە، تەنانەت لەناو دیوانی وەزارەتیش چەند هەنگاوێكی گرنگ نراون بۆ ئەو بەرنامەیە و یەكەكانی ژمێریاری هەموویان یەكخراون، كار لەسەر ئەوانەش دەكرێ كە لە رابردوودا پلەی ناشایستەیان پێدراوە، كار لەسەر پۆلینكردنیش دەكرێت”.

ناوبراو ئەوەشی خستەڕوو “پڕۆژەی چاكسازی پڕۆژەیەكی بەردەوامە، ئاسان نیە بە رۆژێك و دووان كۆتایی پێبێت، بەڵام ئیرادەیەكی بەهێزی سیاسییی پێویستە بۆ جێبەجێكردنی بە تایبەتیش لەناو هێزی پێشمەرگەو بۆ یەكخستنەوەی ئەو هێزە”.

هەروەك سەرۆكی ئەو لیژنەیە دەڵێ ئەوان تاڕادەیەك گەشبینن بە پرۆسەی یەكخستنەوەی هێزی پێشمەرگەو دەڵێ “وەكو لیژنەی كاروباری پێشمەرگە تارادەیەك گەشبینین بەو پرۆسەیە، چونكە ئەو یەكخستنەوەیە بەستراوەتەوە بە ناكۆكییە سیاسیەكانی هەرێمی كوردستان، بۆیە پێویستە ئیرادەیەكی سیاسیی بەهێز لەلایەن لایەنە سەرەكییەكانی ناو حكوومەتی هەرێمی كوردستان هەبێت بۆ ئەو یەكخستنەوەیە بەتایبەتیش پارتی و یەكێتیی ، ئەگەر ئەو بڕیارو ئیرادە بەهێزە لای ئەوان هەبێت، ئەوا بێگومان زیاتر ئەو پرۆسەیە دەچێتە پێش، بەڵام بەگشتی هەموولایەنەكان رەزامەندن لەوەی كە چاكسازی لەناو هێزی پێشمەرگەدا ئەنجام بدرێت”.