راگەیاندن کەی کۆتایی بەجەنگ دەهێنێت ؟!

0

عەبدولغەفار عەبدوڵڵا

راگەیاندن کەی کۆتایی بەجەنگ دەهێنێت ؟!

لەوێ رۆژێی ساڵی رابردوو، کاتێک شەڕی داعش بەرۆکی ئەم وڵاتە خێرلەخۆ نەدیوەی گرتووە، هەرچی بۆن و بەرامی خۆشی و حەسانەوەیە لە نێو ماڵ و حاڵی هیچ تاکێکی کورد بەدی ناکەین و بەداخەوە دەکرێ بڵێن هەر نەماوە!.

هەرچی دەیبینی بەردەوام نائومێدی لە رووخساری دەبارێ و حەوسەڵەی کەسی نییە، لە نێو ماڵ لە بازاڕ و فەرمانگەو هەموو کونجێکدا، هەر دوو کەس بەیەکەوە دابنیشن باس باسی شەڕە، یا نەبوونی مووچە و بودجەیە!

ئیتر جاری وا هەیە دەمەو بۆڵەشی لێدەکەوێتەوە، ئیتر خوانەکا، یەکێکیان بۆچوونێکی دژ دەربڕێت!

لەو بارودۆخەدا راگەیاندنەکان بەتایبەتی تیڤییەکان، بەردەوام هەواڵەکان و سروود و گۆرانییەکانی تایبەتن بۆ ئەو رەوشە  و دیمەنی شەڕ پەخش دەکەن، من ناڵێم با تەلەڤزیۆنەکان خەریکی نمایشکردنی بەزم و سەماو هەڵپەڕکێ بن، بەڵام ناشکرێ لە ناو زیاتر لە (25) کەناڵی ئاسمانی کوردیدا تروسکاییەک بۆ خانەوادەوەکان بەدی نەکرێن بۆ بینینی ساتەوەختێکی ئارامبەخش.

ئەو ڕەوشەی بەرۆکی کوردستانی گرتووە، هەموو کوردێکی دڵسۆز خۆی بەخاوەن و خەمخۆری دەزانێت، وەک زۆرینەی سیاسییەکان لەسەر ئەو دێڕە هاوڕان کاتێک دەڵێن (بەرەی جەنگی ئەم جارەی شەڕی داعش هەموو کوردی یەکدەست و یەک هەڵوێست کرد) ئەوەیان جێی خۆشحاڵییە بۆ هەموومان، بەڵام ناکرێ هەموو ژیان و ساتەکان باس و خواسی منداڵێک، گەنجێک، ژنێک لە ماڵەوە، کچێک، کوڕێک بەدەم رۆیشتنی بۆ قوتابخانە بەردەوام  ترس و دڵەڕاوکێ بەرۆکی گرتبێت و نەتوانێ هەناسەی ژیان بێ دووکەڵی شەڕ هەڵمژێت. بۆیە ناکرێ ئەگەر خوانەخواستە چەند ساڵێک ئەو شەڕە نەگریسە بەرۆکی بەر نەداین، ئیتر شەڕ و نەهامەتی لە هەموو شوێنێَکی ژیان بێت، بەڵی (پێشمەرگە) ئەوەی ئەو کردوویەتی لە رابردوو تا ئەمڕۆ و بۆ دواتریش، نەوە لە دوای نەوە شانازی پێوە دەکات و تا پێشمەرگەش هەبێت کورد و کوردستان هەر سەربەرزە! ئیتر کاتی ئەوە هاتووە راگەیاندنەکان بەگشتی و  بیندراوەکان بەتایبەت، تۆزێک لە رووی سایکۆلۆژیەوە، وزە و هێز ببەخشنەوە بەرۆحەکانی مرۆڤی کورد، چونکە هەموومان زۆر ماندووین بەدەست دڵەڕاوکێ و بیستنی هەواڵی ناخۆشی (داعش و بەغدا) کە پێم وایە ئەو دووانە هەریەکەیان بە جۆرێک ئازاری دڵ و هەستیان داوین، کەسیشان کەمتەرخمیان نەکردووە بۆ ئەو کارە، بگرە بەغدا لەوەتەی هەیە هەر دێوەزمەیەکی ناشرین بووە بۆ کورد، ئەوەتا پێش داعش ئەو جەنگی خۆی لەگەڵ کورد بەرپا کرد و تائێستاش ئامادە نییە ئەو جەنگە ترسنۆکانەیە بە کۆتا بهێنێت، کە ئەویش بڕینی قوتی کوردە.

هیوام وایە ئیتر هێز بخەینەوە بەر تاکی کورد راگەیاندنی کوردی بەگشتی و بە تایبەتی بە جۆرێکی دیکە پشتگیری خەبات و خۆڕاگری پێشمەرگە بکات.

ئاخر بینیومە دەچیتە لاى دوکانێک بۆ کڕینی پێویستییەک، خاوەن دوکانەکە ئەوەندەی چاوی بڕیوەتە ئەو تەلەڤزیۆنەی کە دایناوە، نیو هێندە ئاگەی لە کڕیارەکانی نییە. لای دوکاندارێک داوای کارتێکی مۆبایلم کرد، پێم گوت کارت هەیە کاکە؟ پێی گوتم هەر ئەو کارتە مابوو ئەویش بەکار بهێنن و ببڕێتەوە. منیش وتم بۆچی نەتماوە یان نایهێنێت و خێری نەماوە؟ لەوەڵامدا گوتی ناکاکە لەگەڵ تۆم نەبوو، ئەوە مێزگردێکە لە ئێوارەوە سەیری دەکەم، ئەو برادەرەی دانیشتووە ئەندام پەرلەمانێکی کوردە لە بەغدا دەڵێت هەر ئەو کارتە ماوە بەکاری بهێنین، منیش پێی دەڵێم بەکاری  بهێنن و وەرنەوە نەجاتمان بدەن.

یەکێک لەتێزە هەر گرینگەکانی فەیلەسوفی فەڕەنسی (بۆدلێر) کە لەسەر راگەیاندن گوتوویەتی (هەمیشە راگەیاندن واقیعێکت نیشان دەدات، لەسەروو ئەو واقیعەوەیە کە لە کۆمەڵگەدا هەیە). هەروەها نووسەری ئەڵمانی (ئێریش ماریا رێمارک) لە رۆمانە تازەکەی کە (بەرەی رۆژئاوا ئارامە)  ئەمساڵ (2015) دەرچووە، لە دەستپێکدا دەڵێت (ئەم کتێبە نە دەبێت سکاڵا بێت، نە ددانپێدانان، دەبێت تەنیا ئەو هەوڵە بدات، باسی وەچەیەک بکات، کە جەنگ وێرانی کرد، لەگەڵ ئەوەشدا لە مووشەکەکانی دەرباز بوو!).

 

Share.

About Author

بوچون نوسین داخراوە.

Social Media Auto Publish Powered By : XYZScripts.com