فۆتۆ: خەندان، ئاڤان جاف
خۆتان گێل مەکەن تاجەگوڵینە و گریانەکانی هەمووتان لای هەڵەبجەییەکان بەیەک توورە
رزگار رەزا چوچانی
٢٤ ساڵە هەموو رۆژی ١٦ ی سێیەک لای کورد گریان و فرمێسک بارانە، بەڵام زۆری پێناچێت تەنها پێنج رۆژ دوای ئەو گریانە و لەنەورۆزدا سەرچۆپی بەر کەس ناکەوێت، مانگی ئادار کوردی کردۆتە دووڕووترین و جۆکەرترین میللەتی سەر ئەرز، لەو مانگەدا ئاهەنگی سەرکەوتن دەگێڕین، هەڵدەپەڕین بۆ رزگاری وڵات، هەر لەومانگە یادی شکست دەکەینەوە، دواتر دەگرین بۆ لەداستدانی پێنج هەزار هاوڵاتی بێتاوان، ژن، مناڵ، پیاو، پرسەی کوشتنمان سازدەکەین و فرمێسک دەڕێژین. لەو مانگەدا ئاهەنگی لەدایک بوونی رابەڕێک و پرسەی لەدەستدانی هەمان رابەر دەگێڕین.
ئەوەی لێرە من دەمەوێ دوو شتی لەسەر بڵێم، پرسەی مانگی سێیە بۆ هەڵەبجە، ئەو پرسەیەی کە هەموو کورد دەگریەنێت، بەڵام تەنها بۆ چەند رۆژێکەو بەس، دوای ئەوە هەموو پرسەکە هەموو ئازارەکان بۆ هەڵەبەجەییەکان بەتەنها و بۆ قوربانیانی ئەو هێرشە دڕندانە دەمێنێتەوە، ئێمە لە هەموو ١٦ی سێیەکدا گوڵ لەسەر گڵکۆی پێنج هەزار شەهید دادەنێن، بەڵام لە١٧ی سێدا گوێ بەو مردووە زیندووانە نادەین کە بەرەو مردن دەرۆن و بەدەم ئازارەکانیان روو لەخوا ئەکەن و بەس، کەس نیە هاوئازاریان بێت، کەس نییە هاو خەمیان بێت، ئەوانەی کە پاشماوەی هێرشەکانی سەر هەڵەبجەن، ئەوانەی کە قوربانی ئەو کارەساتەن، ئازارەکانی دوای یادکردنەوەی هەڵەبجە وای لێکردوون رقیان لە فرمێسکەکانی ئێمەیە لەو رۆژەدا، رقیان لە گریانی درۆیینەی ئێمەیە، ئەوان لەو رۆژەدا تێ ئەگەن ئێمە چی میللەتێکی زیندوو کوژین، تێ ئەگەن کە ئێمە دەسەوسان دانیشتووین لەچاوەروانی مردنی ئەوانداین، بۆ ئەوەی بەدەم ئازارەکانیانەوە بمرن و ئێمەش فرمێسکی تیمساحییان بۆ بڕێژین و بیانکەین بەرەمزی مەزڵومی خۆمان، تێ ئەگەن کە ئێمە باکمان نییە بەئازارەکانی ئەوان، بۆیە پرسەبەستن و فرمێسک رشتنمان لە ١٦ سێدا، بەیەک توورە لای ئەوان، گریانمان، بەپێوە راوەستانمان، لەو رۆژەدا لای هەڵەبجەییەکان، درۆیەکی ئەوەندە گەورەیە، بە ئێمەشەوە رقیان لەشارو لەرۆژی پرسەکەی خۆیان دەبێتەوە.
من لە تێگەشتنم لە ئازاری برینداریکی هەڵەبجەوە، لە نەخۆش و گیرۆدەبوویەکی ئازارەکانی چەکی کیمیایی، لە ئازاری رۆحی ئەوانەوە، ئەتوانم رێگە بەخۆم بدەم کە بڵێم، کاتی ئەوە هاتووە، کورد دوای ٢٤ ساڵ واز لەیادکردنەوەی پرسە ئاسا بهێنێت بۆ هەڵەبجە، ئاخر هەتا ئەو رۆژەی ژیان بەردەوام بێت ئازارەکانی خەڵکی هەڵەبجە تەواو نابێ، ئاخر ئازاری خەڵکی هەڵەبجە بە فرمێسکی من و تۆ کۆتایی نایەت، ئاخر کەسێک ئازاری هەبێت، چی تاقەتێکی هەیە سەیری فرمێسکی من بکات تا بۆی بگریەم، ئەو چاوی لە فرمێسکی من نییە، چاوی لەوە نییە کەسێک بۆی بگریەت، چاوی لەوەیە فریاد رەسێک لەئازارەکانی رزگاری بکات، فریاد رەسێک تیماری ئەو برینانەی جەستەو رۆحی بکات، کە ٢٤ ساڵە پێوەی ئەتلێتەوە، سییەکانی لەو ژەهرە بۆ پاک بکاتەوە، بە فێڵی بۆنی سێو کردیان بەسییەکانیاندا و دایانڕزاند، ئاخر کەم نین ئەوانەی لەهەڵەبجە تاکو ئێستا گیرۆدەی ئازارن، کەم نین ئەوانەی کە لەیادی هەڵەبجەدا دەگریەن و بەپێوە رادەوەستن، بەڵام کەمن ئەوانەی فریاد رەسی دڵپڕ حەسەرەت و دڵپڕئازارەکانی هەڵەبجەبن.
هەڵەبجە خەمێکە بۆ هەموو ئینسانیەت، لەنێویاندا خەمێکی تایبەت و سەختە بۆ کورد، بۆیە ئەوە بەتەنها حکومەت نییە بەرپرسیار بێت، لە چارەکردنی خەمەکانی هەڵەبجە لەچارەسەری رۆح پرئازارو گیرۆدەبووەکانی نەخۆشی لەهەڵەبجە، ئەوە ئینسانیەتی هەر تاکێکی کوردە بەوکارە هەستێ، ئەوە ئەرکی منە ئەرکی تۆیە وەکو ئینسان، وەکو هاوڵاتی ئەو وڵاتە، ناکرێ پێمان وابێ ئیمە هیچمان پێناکرێت، بڕوانە ئێستا لەهەموو دنیا هاوکاری دەستەجەمعی هەیە بۆ مەسەلە ئینسانیەکان، بروانە توشبوانی تالاسیمان رەمزێکی رێزگرتنیان هەیە ساڵانە خەڵک بەشانازییەوە دەیکڕێت و پارەی پێدەدات، بۆ ئەوەی هاوکاری ئەوانی پێ بکات، بروانە رەمزی توشبوان بە شیرپەنجە، بە ئایدز، ساڵانە چەندی لێ دەفرۆشرێت، و خەڵکی دنیا چۆن بۆ هاوکاری ئەوان دەیکڕن، و بەشانازییەوە لەیەخەیانی دەدەن، ئاخر خۆ هەڵەبجە رەمزێکە بۆ هەموومان، قوربانییەکە لەهەموومان، بۆچی کۆمەڵەی قوربانیانی هەڵەبجە و هەموو کۆمەڵەکانی تر بیر لەکارێکی واناکەنەوە، خۆ ئەتوانن سیمبولێکی وایان هەبێت هەموو کورد وەک ئەرکی سەرشانی لەپێناو هەڵەبجە پارەی پێبدات و لەپێناو هەڵەبجەش لەیەخەی بدات، کێ هەیە رووی بێت پارە نەدات بەو رەمزە و بەخۆی بڵێ ئینسان؟ بەخۆی بڵێ کورد؟، چ خۆ شاردنەوەیەکە ئێمە هەموو بڵێین خۆ ئێمە حکومەتی خاوەن نەوتمان هەیە، وڵاتی پڕ لەنەوتمان هەیە، خۆ ئەورپا حکومەتی سەرمایەداری هەیە، بەڵام هەر هاوڵاتییەکی ئامادەیە ئەو رەمزانە پارە پێبدات و لەیەخەی بدات، ئەزانی بەفرۆشتی چەند ملیۆن لەو رەمزانە لەهەرساڵێکدا، چی ئەبەخشی بەهەڵەبجە، چەند قوربانی هەڵەبجەی پێ تیمارو چارەسەر دەکرێت،؟. ئێمە با ئەوە بکەینە فرمێکسکی خۆمان بۆ هەڵەبجە، با ئەوە بکەینە یادی خۆمان بۆ هەڵەبجە، نەک گریان، نەک هاو خەمی، نەک رەشکردنی ماڵەکانمان، کێ ئەتوانی بڵێ منیش وەک حکومەت و لەحکومەت زیاتر ئازارم نییە بۆ قوربانییەکی هەڵەبجە؟، ئەی فرمێسکی تیمساحی بۆچی دەڕێژین، کە بەکارێکی وەها هەڵناسین،؟؟.
کاتی ئەوەیە لەرۆژی شەهید کردنی هەڵەبجەدا، هەموو بەهەڵەبجەیەکان بڵێین، ئێوە تەنیا نین، بە دەقەیەک وەستان نا بۆ گیانی شەهیدەکانیان، بە دانانی تاجە گوڵینە نا لەسەر گڵکۆی شەهیدەکانیان، بەڵکو بەکارێک بۆ شەهیدە زیندووەکانیان، بۆ ئەوانەی هەموو رۆژێک لەتاو ئازارەکانیان دەمرن و زیندوو دەبنەوە، ئێمەش لەبیرمان نین تا رۆژی یادی هەڵەبجە، بە ئێمە یادی هەڵەبجە بکەینەوە بەکارێک بۆ کەمکردنەوەی ئازارەکانیان، نەک بە فرمێسکێک بۆ شەهیدەکانیان.
لایەنێکی تر ئەوەیە کار بکرێت بۆ هێنانە ژێر باری حکومەتی عێراق و ئێران. لەپێناو قەرەبووکردنەوەی هەڵەبجە. چونکە هەڵەبجە لە شەڕی نێوان ئەوان شەهید کرا، نەک لە راپەڕینی کوردستاندا، هەڵەبجە کرایە قوربانی شەڕو تموحی ئەوان، دەبێت هەر ئەوانیش هەردوو وڵات نەک بەتەنها عیراق باجی ئەم تاوانە بدەن، ئاخر پێشمەرگە بۆی نییە بڵێ هەڵەبجەم رزگار کرد ئەو رۆژە، چونکە ئەگەر وای کردبێت، ئەوە بۆ رزگارکردنی هەڵەبجە نەیکردووە، بەڵکو کەواسوری بەر لەشکری ئێران بووە، بۆیە ئێمە دەبێت هاودەنگ هەردوو وڵات بهێنینە ژێر بارو ئەوان قەرەبویی ئەم تاوانە بکەنەوە.
دەبێت خەونی حکومەتی کوردی بزڕێنین و بڵێین یادی بێ خزمەت و کردەوەمان ناوێ، خۆشمان چاوەڕێی رەحمی حکومەت و قەرەبوو نەکەین و وەک لەسەرەوە باسم کرد بە کرینی رەمزێکی هەڵەبجەو لەیەخەدانمان هاوکاری هەڵەبجەبین، ئێمە رەمزێک دەکرین و داهاتی فرۆشی هەموو ئەو رەمزانە دەگەڕێتەوە خەزێنەی خزمەتکردنی قوربانیان.
کوردانی دەرەوە هاودەنگ کار بکەن بۆ فرۆشتنی ئەو رەمزانە نەک هەر لە پارچەکانی کوردستان بەڵکو لەهەموو دنیا، کێ هەیە ئەو رۆژە لەسەر جادە بەو کارە هەڵنەسێت؟؟
من تکامە ئیدی بەسە فرمێسکی تیمساحی. بەسە تەنها چاوەڕوانی لە حکومەت، چونکە ئێمە وڵاتێمان هەیە هەموو قوربانی، کەمنین کەس و کاری ئەنفالەکان، کەم نین کەس و کاری شەهیدەکان، رەنگە لەم کاتەدا ئەگەر ئێمە خزمەتکردنی هەموو ئەم خەڵکە بخەینە ئەستۆی حکومەت بەتەنها، کارێکی هەروا ئاسان نەبێت بۆ حکومەت و ئەوانیش هەر لەپەراوێزخراویدا بمێننەوە، بۆیە تکامە خۆمان لە ئەرکی هاوڵاتی بونمان نەشارینەوە، کە دەمانکاتە هاو ئازار هاوخەم لەگەڵ کەس و کاری قوربانیەکان و قوربانیە زیندووەکان، من دڵنیاتان دەکەم هەموو ئەو شتانەی ئێستا دەیکەین هەموو ئەو چەپکە گوڵانەی ئیستا دایدەنێین. لای بریندارێکی هەڵەبجە بەتورێکە، ئاخر ئەو بەدرێژایی ساڵ لەئازارا بتلێتەوە منیش تەنها یەک رۆژ لەساڵێکدا گۆرانی بۆ بڵێم و فرمێسکی بۆ بڕێژم. ئەمە قسەی قۆڕە؟..
