ژمارەیەکی دیکەی کوردی ئێزدی لە دەستی داعش رزگار دەکڕێن

نوچەنێت
بەرپرسی نوسینگەی رزگارکردنی کچ و ژنانی کوردی ئێزدی، رزگاربوونی ژمارەیەک کچ و ژنی کوردی ئێزدی لەژێر دەستی داعش راگەیاند.

بە رزگاربوونی ئەو 8 كەسە، ژمارەی ئەو كەسانەی تاوەکو ئێستا رزگارکراون گەیشتە 2 هەزار و 936 کەس، نزیکەی 3 هەزار و 400 کەس لەژێر دەستی داعشدا ماون.

حوسێن کۆرۆ، بەرپرسی نووسینگەی رزگارکردنی کچ و ژنانی کوردی ئێزدی، لە کۆنگرەیەکی رۆژنامەوانیدا رزگارکردنی 8 کوردی ئێزدی لەژێر دەستی داعش راگەیاند، كە 5 لەوان ژن و 3 منداڵ بوون.

كۆرۆ لە کۆنگرە رۆژنامەوانییەکەدا ئاماژەی بەوەدا، کە بەردەوام دەبن لەسەر هەوڵەکانیان بۆ رزگارکردنی هەموویان، چۆن لە رابردوودا مزگێنیمان دابووە خەڵکی خۆمان، ئینشائەڵڵا لە رۆژانی داهاتووشدا مزگێنییەكی خۆشتر دەدینە کەسوکاری خۆمان.

حوسێن کۆرۆ دەڵێت، رزگارکردنی سەرجەمیان لەلایەن نووسینگەی رزگارکردنی کچ و ژنانی کوردی ئێزدی سەر بە سەرۆکایەتی حکومەتی هەرێمی کوردستان بووە، بەداخەوە لە رۆژانی رابردوودا هەندێک لایەن خۆیان لەو بابەتە کردە خاوەن و، ئاماژەیان بەوە دابوو، کە گوایە ئەوان رزگاریان كردوون، ئەمەشیان وەکو بابەتێکی حزبی بۆ خۆیان گەڕاندبووەوە، ئێمە وەکو نووسینگەی رزگارکردنی کچ و ژنانی کوردی ئێزدی ئەو دەنگۆیانە رەتدەکەینەوە و هیچ بنەمایەکیان نییە.

لەبارەی چۆنییەتی رزگاركردنیان حوسێن کۆرۆ گوتی، ماوەیەکی زۆرە نووسینگەکەیان بەهاوئاهەنگی لەگەڵ دامودەزگا ئەمنییەکانی پارێزگای دهۆک و وەزارەتی پێشمەرگە و هەندێک لەو کەسانەی لەگەڵیان کاردەکەن، توانیویانە ئەو کەسانە لەژێر دەستی تیرۆریستان رزگار بکەن.