سەرۆکی لیژنەی ئەوقاف: خۆپیشاندەران نوێنەریان نەبوو ئامانجیان نەبوو داوایان نەبوو
نوچەنێت
سه‌رۆكی لیژنه‌ی ئه‌وقاف و كاروباری ئاینی له په‌رله‌مانی كوردستان رایگه‌یاند: ئێمه تاكو ئێستا نازانین ئامانج و رێكخه‌رانی ئه‌و خۆپیشاندانانه‌ی ئه‌مڕۆ هاتنه به‌رده‌م په‌رله‌مان و دواتر له شه‌قامی شه‌ست مه‌تری له هه‌ولێر, چین و كێن, ئامانجیان نه‌بوو.
به‌شیر خه‌لیل بۆ ئاژانسی هه‌واڵ و رادیۆی په‌یامنێر وتیشی: كاتێك هاتنه به‌رده‌م په‌رله‌مان وه‌كو لیژنه‌ی ئه‌وقاف و چه‌ند ئه‌ندامێكی دیكه‌ی په‌رله‌مان چووین بۆ ئه‌وه‌ی پێشوازیان لێبكه‌ین, زۆر هه‌وڵمان دا بزانین چییان ده‌وێ و مه‌به‌ستیان چییه و داواكارییان چییه, به بڵندگۆ قسه‌مان بۆ كردن بۆ ئه‌وه‌ی گوێمان لێبگرن, وتمان با گوێتان لێبگرین بزانین ئێوه داواكاریتان چییه, ئه‌گه‌ر مه‌به‌ست گۆڤاری چرپه‌یه, ئه‌وه هه‌مووی هاتۆته‌جێ و گۆڤاره‌كه داخراوه و سه‌رنوسه‌ره‌كه‌ی ده‌ستگیركراوه.
ئاماژه‌یدا: له‌په‌رله‌مان كاركراوه بۆ ئاماده‌كردنی پڕۆژه یاسایه‌ك, ئه‌وه‌ش یه‌ك له داواكاری ئێوه بوو, ئه‌گه‌ر داواكاری دیكه‌تان هه‌یه , با نوێنه‌رتان بێت قسه‌یان له‌گه‌ڵ بكه‌ین, به‌ڵام نه نوێنه‌ریان هات و نه گوێیان له قسه‌كانی ئێمه گرت و نه ئێمه زانیمان ئه‌وان چییان ده‌وێت, كه‌واته ئه‌وان ئامانجیان نه‌بوو و نوێنه‌ریان نه‌بوو, داوایان نه‌بوو.
روونیكرده‌وه: زۆر به‌داخه‌وه ئه‌و خۆپیشاندانانه ئاراسته‌كه‌ی گۆڕا و توندوتیژی لێكه‌وته‌وه, هه‌ر له پێش ته‌لاری په‌رله‌مان ئه‌و توندوتیژییانه ده‌ستی پێكرد و چه‌ندین پۆلیس و پاسه‌وانی په‌رله‌مان به‌به‌رد و شتی دیكه برینداربوون, چه‌ند دوكان و شوێنی گشتی سوتێنرا, ئێمه وه‌كو لیژنه‌ی ئه‌وقاف و كاروباری ئایینی له په‌رله‌مانی كوردستان پێش ئه‌وه‌ی ئه‌وانه ده‌ست به خۆپیشاندان بكه‌ن كاره‌كانمان ته‌واو كردوه‌و ئه‌و بێرێزییه‌مان قه‌بول نه‌كردو هه‌روه‌ها حكومه‌تیش قه‌بولی نه‌كردووه.
